Monday, February 23, 2015

மதுரையில் தமிழ் காமிக்ஸ் கிடைக்கும் கடைகள் & ஃபெப்ரவரி காமிக்ஸ்கள்

தமிழ் காமிக்ஸ் ரசிகர்களுக்கு ஜாலி ஜம்பரின் அன்பு கலந்த வணக்கங்கள்.

நண்பர்களின் வேண்டுகோளுக்கிணங்கி இனிமேல் தொடர்ந்து காமிக்ஸ் பதிவுகளை இடுகிறேன் (செந்தழல் ரவி அண்ணே, ஓகேவா?). குறைந்தபட்சம் ஒவ்வொரு மாதமும் வெளியாகும் காமிக்ஸ் புத்தகங்களை அட்டவணைப்படுத்தவாவது இது உபயோகமாகும். அதைப்போலவே வெளிநாட்டில் இருக்கும் நண்பர்கள் இந்த பாதம் என்ன என்ன காமிக்ஸ் புத்தகங்கள் வெளியானது என்பதை தேடவும் இந்த பதிவுகள் பயன்படும். 

இதற்க்கு முன்பாக, மதுரையில் காமிக்ஸ் எங்கே கிடைக்கும் என்று பல நண்பர்கள் கேட்டு வருகிறார்கள். அவர்களுக்கு உதவியாக இந்த தகவல்:

1. சூர்யா புக் செண்டர்
எண் 157/A, அழகர் கோவில் தெரு, தல்லாகுளம் போஸ்ட்,
மதுரை 2.
கடையின் தொலைபேசி எண்: 2533 042.
கைபேசி எண்: 99769 25649 

அத்யாவசிய தேவை என்றால் மட்டுமே இந்த எண்ணில் அழைக்கவும், இல்லையெனில் கடையின் தொலைபேசி எண்ணுக்கு அழைக்கவும்.

2. ஸ்ரீராம் நியூஸ் ஏஜென்சி,
78/47. நன்மை தருவார் கோவில் தெரு,
மதுரை 1.
அண்ணாமலை அவர்களின் கைபேசி: 99941 35847

சரி, இந்த மாதம் வெளியான காமிக்ஸ் புத்தகங்கள் என்னென்ன என்பதை பார்ப்போமா?

ஃபெப்ரவரி 2015: தமிழ் காமிக்ஸ் புத்தகங்கள்

1. இரத்தப்படலம் (பாகம் 22 & 23)

இரத்தப்படலம் தொடரின் மறு ஆரம்பமான இந்த தொடரின் மூன்றாவது மற்றும் நான்காவது  பாகங்கள் இந்த இதழில் உள்ளன. 104 பக்கம் கொண்ட முழு வண்ண இதழின் விலை ரூபாய் 120.


2. ஆதலினால் காதல் கொள்ளாதீர்

வாய்ன் ஷெல்டன் தொடரின் தனி கதைகளில் இதுவும் ஒன்று. ஆகையால் முந்தைய கதைகளை படிக்காமலேயே இது புரியும் (இருந்தாலும் புதிய வாசகர்களுக்காக கதாபாத்திர அறிமுகம் செய்திருந்தால் நன்றாக இருந்து இருக்கும்). 54 பக்க புத்தகத்தின் விலை ரூபாய் 60.


3. சைத்தான் விஞ்ஞானி (ஸ்பைடர் கதையின் முதல் மறுபதிப்பு)

தமிழ் காமிக்ஸ் உலகின் சூப்பர் ஸ்டார் ஸ்பைடர் கதைகளில் இதுவரை மறுபதிப்பு செய்யப்படாத கதைகளில் ஒன்றான சைத்தான் விஞ்ஞானி கதை இம்மாதம் மறுபதிப்பு செய்யப்பட்டு வந்துள்ளது. சென்ற மாதமே சென்னை புத்தக கண்காட்சியில் வெளியாகவேண்டிய இந்த இதழ், பைண்டிங் தாமதம் ஆனதால் இம்மாதம் வெளியாகி இருக்கிறது.

122 பக்கங்களை கொண்ட இந்த கருப்பு வெள்ளை இதழின் விலை ரூபாய் 50. இந்த இதழின் சைஸ் மேலே இருக்கும் இரண்டு இதழ்களை போல பெரியதாக இல்லாமல் கைக்கு அடக்கமாக, படிக்க ஏதுவாக உள்ளது. முன்பு பாக்கெட் சைசில் வந்த இந்த கதை இப்போது அதைவிட பெரிய அளவில் படிக்க நன்றாகவே இருக்கிறது.


இதைத்தவிர 2012 ஆண்டில் வெளியான இதழ்களின் மறுபதிப்பு வரிசையில் என் பெயர் லார்கோ மற்றும் டபுள் திரில் ஸ்பெஷலை தொடர்ந்து  மூன்றாவதாக கேப்டன் டைகரின் தங்க கல்லறை இதழும் நூறு ரூபாய் விலையில் வெளியாகி இருக்கிறது.

1997ல் முதலில் கருப்பு வெள்ளையில் இரண்டு பாகங்களில் வெளியான இந்த இதழ் இப்போது முழு வண்ணத்தில் படிக்க அட்டகாசமாக இருக்கிறது. என்ன, கருப்பு வெள்ளை இதழின் மொழிபெயர்ப்பு கொஞ்சம் பட்டி, டிங்கரிங் செய்யப்பட்டு இருப்பது பழைய வாசகர்களுக்கு ஆங்காங்கே  இடிக்கும்.



வழமை போல உங்கள் கருத்துக்களை தெரிவியுங்கள்.

நன்றி. வணக்கம்.

Wednesday, July 24, 2013

வாண்டுமாமாவின் ஸ்பெஷல் பேட்டி - பதிவு

தமிழ் காமிக்ஸ் உலகம் தளத்தில் வாண்டுமாமா புகைப்படம் பேட்டி வெளியாகியுள்ளது.

இந்தாருங்கள் சுட்டி : http://tamilcomicsulagam.blogspot.in/2013/07/comic-cuts-50-news-50.html

நன்றி !!

Thursday, April 12, 2012

தமிழ் புத்தாண்டு நல்வாழ்த்துக்கள்

நாளைமுதல் புதியதொரு ஆண்டு மலர்கிறது. புத்தாண்டுகளில் எப்போதுமே ஏதாவது ஒரு விஷயத்தை கடைபிடிக்க எண்ணுவதுண்டு (உதாரணமாக டயரி எழுதவேண்டும், காலையில் ஜாக்கிங் செல்ல வேண்டும் என்றெல்லாம்). ஆனால் ஒவ்வொரு வருடமும் முதல் ஐந்து நாட்கள் அல்லது மிஞ்சிப் போனால் பத்து நாட்கள் மட்டுமே இந்த ரெசல்யூஷன் வரும். பின்னர் பழைய குருடி கதைதான். ஆனால் இந்த முறை மட்டும் காமிக்ஸ் உலக நண்பர்களுக்காக ஒரே ஒரு வேண்டுகோள் வைத்து அதனை அனைவருமே பின்பற்ற ஆசைப்படுகிறேன்.

Lucky Luke

மேலே இருக்கும் அழகான இந்த சித்திரத்தை பாருங்கள். லக்கிலூக்கின் அதிதீவிர எதிரியான டால்டன் சகோதரர்களும், அதிரடிப்போடியன் பில்லியுமே அழகாக நமக்காக நட்புடன் போஸ் கொடுத்துக்கொண்டு இருக்கிறார்கள். சர்ரியலிச உண்மைகளை விளக்கினால் இவர்கள் வெறும் கதை மாந்தர்கள் மட்டுமே. கதையில் சண்டை போடும் இவர்கள் கதை களனுக்கு வெளியில் இப்படித்தான் இந்த கதாசிரியரின் பார்வையில் இருப்பார்கள். அப்படி இருக்க, இந்த கதைகளின் தீவிர ரசிகர்களாகிய நாம் மட்டும் என் சண்டை, சச்சரவு என்று புழுதியை அடுத்தவர் மீது வாரியிறைக்க வேண்டும்?

என்னுடைய சிறு வயதில் பாடப்புத்தகத்தில் இந்த வாசகங்கள் இருக்கும். எனக்கு மிகவும் பிடித்தவை அவை:

"இந்தியர் என்பதில் பெருமிதம் கொள்வோம், இணைந்தே இன்னும் பல சாதனை புரிவோம்".

இந்த வாசகத்தை சிறிதே மாற்றி,
"காமிக்ஸ் ரசிகர் என்பதில் பெருமிதம் கொள்வோம், இணைந்தே இன்னும் பல சாதனை புரிவோம்" என்று செயல்படலாமே?

Blog Widget by LinkWithin